1Th 5 | MTI | STEP | Tatangwanen, kum me aniyau nu gigirum yenan den teta, kuiyawa ye me yaug anoene.

a 5:2 Mat 24:42-43; 2Pi 3:10; Rev 3:3

b 5:3 Mat 24:39; Ruk 21:34-35

c 5:5 Rom 13:12

d 5:8Ais 59:17; Epe 6:14,17

e 5:10 Rom 14:8-9; 1Te 4:14

f 5:14 2Te 3:6,11

g 5:15 Rom 12:17; 1Pi 3:9

m 5:25 1Ko 4:3; 2Te 3:1

1 Thessalonians 5

1 Tatangwanen, kum me aniyau nu gigirum yenan den teta, kuiyawa ye me yaug anoene. 2 ^aYe yembovit yaug anoene Ayapan kumiwa arampuna ub abnawa mina uwape. 3 ^bIyayapan vemewa, “Yum ge at oraiwa,” amta onan wakukamtanwa uwape. Me vesin bug anewa dawai avivi mina, mu oma den ane ayun watpe.

4 Megara, tatangwanen, ye sisip danave den wakeyana. Meoya oiyat mame ub abnawa mina ye ape den teraya. 5 ^cYe undag eyawa usitainawa ge oiyat usitainawa. Nu aram ge sisip usitainawa onan. 6 Meoya, iyayapan upeba mina den kubvinigimta. Nu numbovit yangunwa mereruwape numbovit amarata. 7 Bira bira kubvinemewa aram kubvinigimpe, sira bira bira yoi yaigipama nemewa aram yoi yaigipama naigimpe. 8 ^dNu oiyat igiyawa. Nu numbovit amarata. Anotumat ge baigan mut beyanawa togunup teta, sira nu owanowan waitawaita mut keretawa kuiyunup tonatta. 9 God imive mamaib nunan baraune. God danapiri meuma den auta, megara Ayapan numa Iesu Keriso gumbe waita auta. 10 ^eAyapan nunan boane. Me nu yangunwa mereruwanewa ge kubvinetewa, Ayapan gaibu wakeigimtan oya. 11 Meoya, gare ye ene mina, ano yusiwa yeuma garagara waita ag anoano yeuma garagara sig doriya.

Toyau Toyau Oieba

12 Tatangwanen, nu yenan nun vete. Ye yapeyap bira bira nau yaigipam emewa anog auya. Ayapan gumbe namuyoiyoi eme gae yusipam diruiemewa anog auya. 13 Nau muma oya baigan gumbe ayamat undag muniya. Ye desirom desirom guniyap yum danave wakeigimiya. 14 ^fTatangwanen, nu toyau yenta mamaib aya. Ui irai irai igiyawa gae yusipam dirumiya, a emewa ano yusiwa muniya, yutu onanwa waita muniya, iyayapan undag gumbo yai wakeigimiya. 15 ^gYaukapa. Bira da kukaeba gumbe wakepewa kukaeba garawa den ape. Megara ye yapeyap ge iyayapan undag gumbo evedni a ge yaug oraivit aigimiya.

16 ^hEvedni evedni degadega aigimiya. 17 Nun waigimiya den kweigimiya. 18 ⁱDividivi undag gaun waigimiya. Kuiyawa mame God yenan anoivi Iesu Keriso gumbe.

19 ^jGuwawa iyameba den kweya boipe. 20 God gaiyawa yai anog amaraya. 21 ^kDividivi undag yangut yauya, sira oraivitwa kikikit yumnasiya. 22 Kukaeba gina ubeubewa undag kweg painau aisiya.

23 ^lGod yum tuiviwa, me membovit ye aiyempe di iyakaisi aya onanape. Ye guwewa ge nonemagewa ge kwapuiwa undag amara yempe. Ayapan numa Iesu Keriso uwapewa, ye pui den auya. 24 Yenan auwanewa me ano amat oraiwa abnawa, meoya me oma ane yenan ape.

25 ^mTatangwanen, nunan nun waigimiya. 26 Tateaiwa undag gumbo iyakaisi gumbe noi tog kaiwa kaiwa waya. 27 Ayapan gumbe ne diruitna. Gigirum mame basiya, tateaiwa undag anope.

28 Ayapan numa Iesu Keriso ano oraiwa ye guniyap wakeigimpe.